Team Chabuk-Gujarat Desk: રાજ્યભરમાં કાળઝાળ ગરમી પડી રહી છે. ગરમીના કારણે લોકો હેરાન-પરેશાન છે. બપોરના સમયે તો ઘરની બહાર નીકળવું પણ મુશ્કેલ બની ગયું છે. હવામાન વિભાગ દ્વારા આપવામાં આવેલી હિટવેવની આગાહીના કારણે આગ ઝરતી ગરમી પડી રહી છે. સૂર્યનારાયણ પોતાનો પ્રકોપ વર્તાવી રહ્યા છે. મનુષ્યોની સાથે સાથે ગરમીના કારણે પશુ-પક્ષીઓ પણ અકળાઈ રહ્યા છે. ત્યારે ગરમીની આ અસર હવે રસ્તાઓ પર પણ દેખાઈ રહી છે. વાત જૂનાગઢની છે, જ્યાં અસહ્ય તાપના કારણે રસ્તા પરનો ડામર પણ ઓગળવા લાગ્યો છે.
સૌરાષ્ટ્ર પંથકમાં ગરમી પોતાનો કેર વર્તાવી રહી છે. તાપમાનનો પારો 40 ડિગ્રીને પાર પહોંચી ગયો છે. ત્યારે આ આગ ઝરતી ગરમીને ડામર રોડ પણ સહન નથી કરી શકતાં. જૂનાગઢની વાત કરીએ તો, ગઈકાલે જૂનાગઢમાં ભારે ગરમીના કારણે ડામરના રસ્તાઓ પર ડામર ઓગળવા લાગ્યો હતો. બપોરના સમયે તાપમાન ઉંચકાઈ જતાં ડામર રોડનો ડામર ઓગળવા લાગ્યો હતો. જૂનાગઢ શહેરના જાહેરમાર્ગોના ડામર ઓગળવા લાગ્યા હતા.
રસ્તાઓ પર ગરમીના કારણે ડામર ઓગળવા લાગતા રાહદારીઓ તેમજ વાહનચાલકોને ભારે મુશ્કેલી પડી હતી. રસ્તાઓ પરથી પસાર થતાં લોકોના પગરખાં પણ ડામર સાથે ચોંટવા લાગ્યા હતા જેથી લોકોને ચાલવામાં પણ મુશ્કેલી પડી હતી. રસ્તાઓ પર ઓગળતો ડામર વાહનોના પૈડાં સાથે પણ ચોંટ્યો હતો. રસ્તાઓની આ હાલત જોઈને જ અંદાજો લગાવી શકાય છે કે ઉનાળો કેટલો આકરો બન્યો છે. ભારે ગરમીના કારણે લોકો કામ વિના બહાર પણ નથી નીકળી રહ્યા જેના કારણે જૂનાગઢમાં બપોરના સમયે જાહેર માર્ગો સૂમસામ ભાસી રહ્યા છે.
લોકો ગરમીથી બચવા માટે વિવિધ પ્રયોગો અજમાવી રહ્યા છે અને ઝડપથી આ ગરમીમાંથી છૂટકારો મળે તેવી આશા રાખી રહ્યા છે. રાજ્યમાં કાળઝાળ ગરમીનો પ્રકોપ યથાવત રહેશે. હવામાન વિભાગે કચ્છ અને કંડલામાં હીટ વેવની આગાહી કરી છે. અમદાવાદમાં ઓરેંજ એલર્ટ આપવામાં આવ્યું છે. અમદાવાદમાં આજે 44 ડિગ્રી તાપમાન પહોંચવાનું અનુમાન છે. સતત ત્રીજા દિવસે અમદાવાદ, ખેડા અને આણંદમાં ગરમીનો પારો 43 ડિગ્રીને પાર પહોંચ્યો છે.
તાજેતાજો ઘાણવો
- સુરેન્દ્રનગર જિલ્લામાં ‘ઓરેન્જ એલર્ટ’: ૪૫.૫ ડિગ્રી સાથે રાજ્યનું સૌથી ગરમ શહેર, આગામી બે દિવસ સાવચેત રહેવા અનુરોધ
- ગુજરાતમાં આજના ટોપ 5 ટ્રેન્ડિંગ ન્યૂઝ: સ્થાપના દિવસથી લઈને બુલડોઝર એક્શન સુધી ચર્ચાનો માહોલ
- રાજકોટ જિલ્લા પ્રાથમિક શિક્ષક ઉત્કર્ષ મંડળ અને બોધીસત્વ આંબેડકર બૌદ્ધવિહારના સંયુક્ત ઉપક્રમે મહારક્તદાન કેમ્પ યોજાયો
- સુરેન્દ્રનગર જિલ્લામાં કમોસમી વરસાદની આગાહી: ખેડૂતોને સાવચેતી રાખવા અનુરોધ
- શું છે ખડગેનું “અભણ ગુજરાત” નિવેદન જેણે સર્જ્યું છે રાજકીય તોફાન? જાણો સંપૂર્ણ વિગત
