Team Chabuk-Gujarat Desk: સરકારી હોસ્પિટલમાં લગભગ વિનામૂલ્યે ઉમદા સારવાર ઉપલબ્ધ છે એ વાત ફરી એકવાર વડોદરાની જી.એમ.ઈ.આર.એસ. હોસ્પિટલ,ગોત્રીના બાળ સારવાર વિભાગે પુરવાર કરી છે. કોરોના કાળમાં પણ આ હોસ્પિટલે શ્રેષ્ઠ ગણાય તેવી સેવાઓ અવિરત પૂરી પાડી અને તે પછી મ્યુકરના પીડિતોની પણ ઉમદા સારવાર કરવામાં આવી જે ઉલ્લેખનીય છે. બાળ સારવાર વિભાગમાં આજે જાણે કે આનંદનો અવસર આવ્યો હોય તેમ ચારે કોર આનંદની લહેર ફરી વળી હતી.
તબીબો અને સ્ટાફ એ અન્યના સુખે સુખી અને બીજાના દુખે દુઃખી થનારો સંવેદનશીલ સમુદાય છે. બાળ સારવાર વિભાગમાં આજે એક મહિનાની સઘન સારવાર પછી સાજા અને સ્વસ્થ થઈને વિદાય થયેલા,એક સાથે જન્મેલા ત્રણ નવજાત શિશુઓ અને તેમની માતાને નવજીવન આપવાનો હરખ હતો.
છોટાઉદેપુરની ખાનગી હોસ્પિટલમાં એક માતાની કૂખે જન્મેલા બે ભાઈ અને એક બહેનને ગંભીર ગણાય તેવી હાલતમાં જન્મના ચોથા દિવસે અમારા વિભાગમાં સઘન સારવાર માટે લાવવામાં આવ્યા હતા એવી જાણકારી આપતાં રેસીડેન્ટ તબીબ ડો. મૌસમે જણાવ્યું કે, આ બાળકો ૩૨ સપ્તાહ એટલે કે ૮ મહિને, અધૂરાં માસે જન્મ્યા હતા. ત્રણ પૈકી એકનું વજન ૧.૩૦૦ બીજાનું માત્ર ૯૦૦ અને ત્રીજાનું ૧.૧૦૦ ગ્રામ હતું જે ખૂબ જ ઓછું ગણાય.
૯૦૦ ગ્રામ વજનવાળું બાળક સૌથી ઓછું વજન હોવા છતાં સૌથી સ્વસ્થ હતું. એને ત્રણ દિવસ ઓક્સિજન આપ્યા પછી એની હાલત સારી એવી સુધરી. બાકીના બંને બચ્ચાની હાલત પ્રમાણમાં ઘણી નાજુક હતી. એટલે એમને શરૂઆતના ૫ દિવસ તો વેન્ટિલેટર હેઠળ રાખવા પડ્યાં. ઓછું વજન, અધૂરાં માસે જન્મ અને મોઢા વાટે લોહી પડવા જેવી તકલીફો એમની સ્થિતિને વધુ ગંભીર બનાવતી હતી. એમને ચેપથી પણ બચાવવાના હતાં.
જો કે વિભાગના વડા ડો.નિમિષાના માર્ગદર્શન હેઠળ સહ પ્રાધ્યાપક ડો.ગૌતમ, ડો.મૌસમ અને ડો.શિખરની ટીમે પોતાના જ્ઞાન અને તબીબી કુશળતાથી આ લોકોને બચાવી લેવાના વિશ્વાસ સાથે સારવારનો પડકાર ઉપાડી લીધો. તબીબી ભાષામાં ખૂબ જટિલ ગણાય તેવી સારવાર આપી અને આ નવજાત શિશુઓને ચેપમુક્ત રાખવાની જરૂરી તમામ કાળજી લીઘી. તેની સાથે તેમની માતાની પણ જરૂરી મેડિકલ કેર લેવામાં આવી. નર્સિંગ અને સહાયક સ્ટાફે પણ આ લોકોની ખડે પગે જરૂરી તમામ કાળજી લીધી. તેના પરિણામે બાળકોની હાલત ઉત્તરોતર સુધરી, ગંભીર હાલતમાંથી બહાર આવ્યા, તેમનું વજન સારું એવું વધ્યું. અને આજે સંપૂર્ણ સ્વસ્થ અને તંદુરસ્ત હાલતમાં બાળકો અને માતા પિતાને વિદાય આપવામાં આવી ત્યારે બાળ સારવાર વિભાગમાં જાણે કે હરખની હેલી ફરી વળી હતી. પારકા પરિવારની ખુશહાલી, સુખ અને આનંદ તબીબો અને સ્ટાફને સ્પર્શી ગયાં હતા.પોતાની જહેમત સફળ થયાનો નિઃસ્વાર્થ આનંદ દરેકના ચહેરા પર ઝલકતો હતો.
બાળકોના પિતા હાજી ભાઈએ આભાર ભીના શબ્દોમાં જણાવ્યું કે, તબીબો અને સ્ટાફે ખૂબ ઉમદા સેવા આપી છે. મારો પરિવાર એમનો ખૂબ ખૂબ આભારી છે. ખાનગી હોસ્પિટલમાં આ સારવારનો ખર્ચ સહેજેય લાખનો આંકડો વટાવી જાય. જ્યારે અહીં લગભગ વિનામૂલ્યે સારવાર થઈ. સરકારી દવાખાનામાં ઉમદા સારવાર મળે છે એ હકીકત ફરી એકવાર પુરવાર થઈ.
તાજેતાજો ઘાણવો
- સુરેન્દ્રનગર જિલ્લામાં ‘ઓરેન્જ એલર્ટ’: ૪૫.૫ ડિગ્રી સાથે રાજ્યનું સૌથી ગરમ શહેર, આગામી બે દિવસ સાવચેત રહેવા અનુરોધ
- ગુજરાતમાં આજના ટોપ 5 ટ્રેન્ડિંગ ન્યૂઝ: સ્થાપના દિવસથી લઈને બુલડોઝર એક્શન સુધી ચર્ચાનો માહોલ
- રાજકોટ જિલ્લા પ્રાથમિક શિક્ષક ઉત્કર્ષ મંડળ અને બોધીસત્વ આંબેડકર બૌદ્ધવિહારના સંયુક્ત ઉપક્રમે મહારક્તદાન કેમ્પ યોજાયો
- સુરેન્દ્રનગર જિલ્લામાં કમોસમી વરસાદની આગાહી: ખેડૂતોને સાવચેતી રાખવા અનુરોધ
- શું છે ખડગેનું “અભણ ગુજરાત” નિવેદન જેણે સર્જ્યું છે રાજકીય તોફાન? જાણો સંપૂર્ણ વિગત
