અમદાવાદ શહેરમાં શરૂ થઈ અનોખી સિગ્નલ સ્કૂલ

Team Chabuk-Gujarat Desk: અમદાવાદ શહેરમાં ગરીબ પરિવારના બાળકોને શિક્ષણ મળી રહે તેવા હેતુ સાથે અમદાવાદ મહાનગરપાલિકાના સ્કૂલ બોર્ડ દ્વારા એક નવતર પ્રયોગ હાથ ધરવામાં આવ્યો છે. ચાર રસ્તા પર રખડતાં બાળકોને શિક્ષણ પૂરું પાડવા માટે સ્કૂલ બોર્ડ દ્વારા સિગ્નલ સ્કૂલ (signal school) શરૂ કરવામાં આવી છે. મહત્વની વાત એ છે કે આ સ્કૂલ માટે કોઈ ઓરડા કે બિલ્ડિંગ ઉભી નથી કરાઈ પરંતુ ખાસ પ્રકારની બસ તૈયાર કરવામાં આવી છે અને તેને સિગ્નલ સ્કૂલ નામ આપવામાં આવ્યું છે.

રાજ્યના મુખ્યમંત્રી ભૂપેન્દ્ર પટેલે આ ખાસ પ્રકારની 10 સિગ્નલ સ્કૂલને લીલીઝંડી આપી છે. આજથી આ બસ અમદાવાદ શહેરના અલગ અલગ વિસ્તારોમાં ફરશે અને શિક્ષણથી વંચિત એવા ગરીબ પરિવારના બાળકોને શિક્ષણ આપશે. આ સિગ્નલ સ્કૂલ થકી શિક્ષણથી વંચિત અને શાળાએ અભ્યાસ કરવા ન જતાં બાળકોને શિક્ષણ પૂરું પાડવામાં આવશે.

અમદાવાદ મહાનગરપાલિકાના સ્કૂલ બોર્ડ દ્વાર વર્ષ 2021-22ના બજેટમાં સિગ્નલ સ્કૂલની વિશિષ્ટ જોગવાઈ કરવામાં આવી હતી. આ સિગ્નલ સ્કૂલ શરૂ કરવા પાછળના હેતુ અંગે વાત કરતાં અધિકારીઓએ કહ્યું કે, ઘણી વખત ગરીબ પરિવારના બાળકો ચાર રસ્તા પર જોવા મળતાં હોય છે. તેઓ શાળાએ જઈ શકતાં નથી તેથી બજેટમાં ખાસ આ સિગ્નલ સ્કૂલની જોગવાઈ કરીને આ વિચાર અમલમાં મૂકવામાં આવ્યો છે.

સ્કૂલ બોર્ડ દ્વારા શાળાના ક્લાસરૂમની થીમ પર જ બસમાં સિગ્નલ સ્કૂલ બનાવાઈ છે. જેમાં અભ્યાસ કરવા માટેની તમામ વ્યવસ્થા ઉભી કરાઈ છે. આ સિગ્નલ સ્કૂલમાં બાળકોને બેસાડીને શિક્ષણ આપવામાં આવશે. હાલ આવી 10 બસ બનાવાઈ છે. આ બસો અમદાવાદ શહેરના ગુલબાઈ ટેકરા, આરટીઓ, નારોલ, વસ્ત્રાપુર, નરોડા સહિતના વિવિધ વિસ્તારોમાં જશે અને શાળાએ ન જઈ શકતાં બાળકોને સિગ્નલ પાસે જ શિક્ષણ આપવામાં આવશે.

એક બેસમાં બે શિક્ષક હશે

બસમાં બનાવાયેલી સિગ્નલ સ્કૂલમાં બે શિક્ષક રાખવામાં આવશે. જેમાં એક મુખ્ય શિક્ષક અને એક હેલ્પર તરીકે રહેશે. આ બસ દરેક વિસ્તારમાં સોમવારથી શનિવાર સુધી અલગ અલગ વિસ્તારમાં ફરશે. અને બાળકોને પાયાનું જ્ઞાન આપશે.

એક સાથે 15 બાળકો શિક્ષણ મેળવી શકશે

આ સિગ્નલ સ્કૂલમાં  સીસીટીવી, બાળકોને ગમ્મત સાથે જ્ઞાન મળે તે માટે રમકડાં,  એલઈડી દ્વારા શિક્ષણની વ્યવસ્થા, પુસ્તકો નોટબુક મૂકવા માટે કબાટની વ્યવસ્થા છે. એક બસમાં એક સાથે 15 બાળકો અભ્યાસ કરી શકશે. લાઈટ, પંખા, પીવાના પાણી જેવી પ્રાથમિક સુવિધાઓ હશે. મહત્વનું છે કે, આ સમગ્ર પ્રોજેકટ માટે 12 કરોડની જોગવાઈ કરવામાં આવી છે. ભિક્ષા નહિ શિક્ષા સ્લોગન સાથે સિગ્નલ સ્કૂલ શરૂ કરવામાં આવી છે.

તાજેતાજો ઘાણવો

• સુરેન્દ્રનગર જિલ્લામાં ‘ઓરેન્જ એલર્ટ’: ૪૫.૫ ડિગ્રી સાથે રાજ્યનું સૌથી ગરમ શહેર, આગામી બે દિવસ સાવચેત રહેવા અનુરોધ
• ગુજરાતમાં આજના ટોપ 5 ટ્રેન્ડિંગ ન્યૂઝ: સ્થાપના દિવસથી લઈને બુલડોઝર એક્શન સુધી ચર્ચાનો માહોલ
• રાજકોટ જિલ્લા પ્રાથમિક શિક્ષક ઉત્કર્ષ મંડળ અને બોધીસત્વ આંબેડકર બૌદ્ધવિહારના સંયુક્ત ઉપક્રમે મહારક્તદાન કેમ્પ યોજાયો
• સુરેન્દ્રનગર જિલ્લામાં કમોસમી વરસાદની આગાહી: ખેડૂતોને સાવચેતી રાખવા અનુરોધ
• શું છે ખડગેનું “અભણ ગુજરાત” નિવેદન જેણે સર્જ્યું છે રાજકીય તોફાન? જાણો સંપૂર્ણ વિગત