Team Chabuk-Gujarat Desk: રાજકોટમાં નોકરીની લાલચ આપી યુવતી સાથે છેતરપિંડીની ઘટના બની છે. આરોપીએ એક યુવતી સાથે મિત્રતા કરી હતી. યુવતીને સરકારી નોકરી અપાવવાની લાલચ આપી હતી. ઈન્સ્ટાગ્રામ પર ડૉ. રાજીવ મહેતા નામનું બોગસ ID બનાવ્યું હતું. આરોપીએ યુવતી પાસેથી 23 લાખ, 35 હજાર રૂપિયા પણ પડાવ્યા. જો કે, યુવતીને છેતરાયાનો અહેસાસ થતાં પોલીસ ફરિયાદ નોંધાવી હતી. બગસરાના હાર્દિકે ગાંધીનગરમાં સારી ઓળખાણ હોવાનું કહી આરોગ્ય વિભાગમાં સરકારી નોકરી અપાવી દેવાના બહાને 23.35 લાખ રૂપિયા મેળવી લીધા હોવાની ફરિયાદ નોંધાતા રાજકોટ સાયબર ક્રાઇમ પોલીસે આરોપી હાર્દિકની ધરપકડ કરી વધુ તપાસ હાથ ધરી છે.
લેડી ડોકટર સાથે બગસરાના ગઠીયાએ ઇન્સ્ટાગ્રામ મારફત ફ્રેન્ડ રિક્વેસ્ટ મોકલી પોતે હાર્ટ સ્પેશિયાલિસ્ટ ડોક્ટર છે તેવી ખોટી ઓળખ ઉભી કરી મિત્રતા કેળવી બાદમાં તેણીને સરકારી નોકરી અપાવવાની તેમજ પારૂલ યુનિવર્સિટીમાં એડમિશન અપાવવાના નામે અને રાજકોટ સિવિલ હોસ્પિટલમાં મેડિકલ ઓફિસરની નોકરી અપાવી દેવાના બહાને તેમજ છેલ્લે રાજકોટમાં પોતે 400 બેડની હાર્ટ હોસ્પિટલ શરૂ કરી રહ્યો છે તેમાં ભાગીદાર બનાવવાની લાલચ આપી ધીમે ધીમે મળીને કુલ રૂ. 23.35 લાખ મેળવી ઠગાઇ કરતાં રાજકોટ શહેર સાયબર ક્રાઇમ પોલીસે ગુનો નોંધી આરોપી હાર્દિકની ધરપકડ કરી. પોલીસ તપાસમાં આરોપી હકિકતે ડોક્ટર નહિ પણ ભાડાની દુકાનમાં મોબાઇલ શોપ લે વેચ તથા રીપેરીંગનો ધંધો કરતો હોવાનું ખુલ્યું હતું.
યુવતીએ જણાવ્યું હતું કે હું તબિબ છું અને હાલમાં નોકરી કરતી નથી. સોશિયલ મિડીયા ઇન્સ્ટાગ્રામમાં મારું એકાઉન્ટ છે. મારા ઇન્સ્ટાગ્રામ એકાઉન્ટ પર રિક્વેસ્ટ આવી હતી. જે મેં સ્વીકારી હતી. એ પછી તેની સાથે વાતચીત શરૂ થઇ હતી. જે તે વખતે તેણે પોતાની ઓળખ ડો. રાજીવ મહેતા તરીકે આપી હતી. વાતચીત આગળ વધતાં એકબીજાના મોબાઇલ ફોન નંબરની આપ-લે થઇ હતી. તે વખતે રાજીવે પોતે હાર્ટસર્જન છે અને સુરતમાં પોતાની હોસ્પિટલ છે તેમજ હોસ્પિટલનું નામ મહેતા હાર્ટ ઇન્સ્ટીટયુટ છે તેવું કહ્યું હતું. એટલુ જ નહિ આ હોસ્પિટલ 700 બેડની હોવાનું પણ કહ્યું હતું.
બાદમાં ડો. રાજીવે મને કહેલું કે તમારે સરકારી નોકરી જોઇતી હોય તો મારા ફઇનો દિકરો રાહુલ ગાંધીનગર સરકારી અધિકારી છે તેના મારફત તમને સરકારી ડોક્ટર તરીકે નોકરી અપાવીશ. પંરતુ તમારે રૂ. 2.50 લાખ ભરવા પડશે. આ વાતમાં મને વિશ્વાસ બેસતાં અને તેણે મને નોકરી અપાવી જ દેશે તેવું વચન આપતાં મેં આ રકમ આપી હતી. એ પછી થોડા દિવસ બાદ પારૂલ યુનિવર્સિટીમાં એડમિશન લેવાનું હોઇ તેમાં માર્ક ઓછા પડતાં હોઇ મેં ડો. રાજીવ મહેતાને વાત કરતાં તેણે કહેલું કે પારૂલમાં પણ મારા ઓળખીતા મેડમ છે જે તારું એડમિશન કરાવી આપશે. પરંતુ આ માટે મેનેજમેન્ટ ફી તમારે ભરવી પડશે અને એ ફીની રકમ 9,75,000 જેવી થાય છે. મેં એડમિશન માટે રાજીવને કટકે કટકે ગૂગલ પેથી તથા બેંક એકાઉન્ટમાં રકમ મોકલી હતી. બાદમાં મેં મારા સબંધીને ડો. રાજીવ અંગે વાત કરી હતી અને તેણે મારા ભાઇ સાથે વાત કરી હતી. ડો. રાજીવે ત્યારે કહેલુ કે રાજકોટ સિવિલ હોસ્પિટલમાં મેડિકલ ઓફિસરની જગ્યા ખાલી છે તેમાં તમારે જોબ મેળવવી હોય તો મારા ફઇનો દિકરો ગાંધીનગર સરકારી અધિકારી છે તે તમને રાજકોટ સિવિલમાં મેડિકલ ઓફિસરની નોકરી અપાવી દેશે તેમ કહી તેના માટે રૂ. 2 લાખ ભરવા પડશે તેમ કહેતા મારા ભાઇએ ગૂગલ પેથી તથા બેંક એકાઉન્ટ મારફત ડો. રાજીવને આ રકમ મોકલી દીધી હતી.
બાદમાં તેણે કહ્યું કે હવે હું રાજકોટમાં એરપોર્ટ રોડ પર 400 બેડની મહેતા હાર્ટ હોસ્પિટલ ચાલુ કરવાનો છું, તેમાં તમારે ભાગીદારીમાં રહેવું હોય તો મને જણાવો. જેથી મેં ઘરે વાત કરતાં મને ના પાડવામાં આવી હતી. પણ મારા ભાઇને વાત કરતાં તેણે ડો. રાજીવ સાથે વાત કરતાં તેણે વચન-વિશ્વાસ આપતાં અમે રૂ. 7.95 લાખ ભાગીદારી પેટે ડો. રાજીવ મહેતા તરીકે પોતાને ઓળખાવનારને આપી દીધા હતાં. આ ઉપરાંત બીજા 1,15,000 પણ કટકે કટકે મેં તેને આપ્યા હતાં. આમ કુલ રૂ. 23.50 લાખ ડો. રાજીવ મહેતાને મેં આપ્યા હતાં. પરંતુ બાદમાં ખબર પડી હતી કે આ કોઇ ડોક્ટર નથી અને બગસરામાં રહેતો હાર્દિક જયેશભાઇ અહાલપરા નામનો 37 વર્ષનો શખ્સ છે. તેણે મારી સાથે ખોટા નામે ઇન્સ્ટાગ્રામ પર સંપર્ક કરી મિત્રતા વધારી નોકરી, એડમિશન અને રાજકોટની સિવિલમાં નિમણુંક અપાવવા ઉપરાંત રાજકોટમાં શરૂ થનારી હોસ્પિટલમાં ભાગીદારીના બહાને કટકે કટકે લાખો રૂપિયા લઇ લીધા હોઇ મેં સાયબર ક્રાઇમ પોલીસનો સંપર્ક કરી ફરિયાદ નોંધાવી હતી.
તાજેતાજો ઘાણવો
- સુરેન્દ્રનગર જિલ્લામાં ‘ઓરેન્જ એલર્ટ’: ૪૫.૫ ડિગ્રી સાથે રાજ્યનું સૌથી ગરમ શહેર, આગામી બે દિવસ સાવચેત રહેવા અનુરોધ
- ગુજરાતમાં આજના ટોપ 5 ટ્રેન્ડિંગ ન્યૂઝ: સ્થાપના દિવસથી લઈને બુલડોઝર એક્શન સુધી ચર્ચાનો માહોલ
- રાજકોટ જિલ્લા પ્રાથમિક શિક્ષક ઉત્કર્ષ મંડળ અને બોધીસત્વ આંબેડકર બૌદ્ધવિહારના સંયુક્ત ઉપક્રમે મહારક્તદાન કેમ્પ યોજાયો
- સુરેન્દ્રનગર જિલ્લામાં કમોસમી વરસાદની આગાહી: ખેડૂતોને સાવચેતી રાખવા અનુરોધ
- શું છે ખડગેનું “અભણ ગુજરાત” નિવેદન જેણે સર્જ્યું છે રાજકીય તોફાન? જાણો સંપૂર્ણ વિગત
