Team Chabuk-Gujarat Desk: માતેલા સાંઢની જેમ ગામ આખામાં રખડતા અને રસ્તે આવનારા કોઈને પણ અડફેટે લેતા ઢોરનો જામનગરમાં દિનપ્રતિદિન ત્રાસ વધી રહ્યો છે. એવામાં રખડતાં ઢોરનાં ત્રાસનો વધુ એક વીડિયો સામે આવ્યો છે. જેમાં એક મહિલાને ગાયે બે મિનિટ સુધી ઢીંક મારી બેશુદ્ધ કરી નાખી હતી. આસપાસમાંથી પંદરથી વધુ લોકો આવ્યા ત્યારે ગાયે મહિલાનો પનારો છોડ્યો હતો. ત્યાં સુધી તે મહિલાના શરીરને જ્યારે ક્ષતવિક્ષત કરી નાખવું હોય એમ તૂટી પડી હતી. ઈજાગ્રસ્ત મહિલાને બાદમાં હોસ્પિટલમાં સારવાર હેઠળ ખસેડવામાં આવી હતી.
આ સમગ્ર ઘટના જામનગર શહેરના રણજીતરોડ પર આવેલ ચૌહાણ ફળીની શેરી નંબર-2માં બની છે. રાજકોટમાં રહેતા કાશ્મીરાબહેન તેમના પિતાને ત્યાં આવ્યા હતા. તેઓ પોતાના ઘર પાસેથી ચાલીને જઈ રહ્યા હતા ત્યારે એક ગાય તેમની પાછળ પડી હતી. કાશ્મીરાબહેને તેને ભગાડવાનો પ્રયાસ કર્યો હતો, પણ બાદમાં ગાયે તેમને ઢીંકે ચડાવ્યા હતા અને ફંગોળી દીધા હતા. મહિલા ઊભા થવાનો નિરર્થક પ્રયાસ કરી રહી હતી પણ ગાયે તેમને મકાનની દિવાલના ખૂણામાં દબાવી દઈ પોતાનું બધું જોર ઢીંક પર લગાવી દીધું હતું.
આ સમયે શેરીમાં કોઈની અવરજવર ન હોય તેમની પુત્રી માતાનું રક્ષણ કરવા દોડી આવી હતી. જોકે ગાયે તેના પર પણ હુમલો કરવાનો પ્રયાસ કર્યો હતો. આખરે આસપાસના લોકોનાં ટોળા ભેગા થયા હતા અને પંદર લોકોએ ગાયને દૂર હટાવી કાશ્મીરાબહેનનો જીવ બચાવ્યો હતો. અહીંથી તેમને જામનગરની જીજી હોસ્પિટલમાં ખસેડવામાં આવ્યા હતા.
જામનગરમાં આ પહેલી વખત નથી. જાનવરો મુક્ત મને રખડતા હોય છે અને નજીકમાંથી કોઈ પસાર થાય તો તેને ઢીંક દ્વારા ઈજા પહોંચાડતા હોય છે. અગાઉ પણ આવી ઘટનાઓ બની ચૂકી છે. અસંખ્ય વખત ફરિયાદો અને ઘટનાના વીડિયો વાઈરલ થતા હોવા છતાં તંત્ર હાથ પર હાથ ધરીને બેઠું રહે છે.
તાજેતાજો ઘાણવો
- સુરેન્દ્રનગર જિલ્લામાં ‘ઓરેન્જ એલર્ટ’: ૪૫.૫ ડિગ્રી સાથે રાજ્યનું સૌથી ગરમ શહેર, આગામી બે દિવસ સાવચેત રહેવા અનુરોધ
- ગુજરાતમાં આજના ટોપ 5 ટ્રેન્ડિંગ ન્યૂઝ: સ્થાપના દિવસથી લઈને બુલડોઝર એક્શન સુધી ચર્ચાનો માહોલ
- રાજકોટ જિલ્લા પ્રાથમિક શિક્ષક ઉત્કર્ષ મંડળ અને બોધીસત્વ આંબેડકર બૌદ્ધવિહારના સંયુક્ત ઉપક્રમે મહારક્તદાન કેમ્પ યોજાયો
- સુરેન્દ્રનગર જિલ્લામાં કમોસમી વરસાદની આગાહી: ખેડૂતોને સાવચેતી રાખવા અનુરોધ
- શું છે ખડગેનું “અભણ ગુજરાત” નિવેદન જેણે સર્જ્યું છે રાજકીય તોફાન? જાણો સંપૂર્ણ વિગત
