Team Chabuk-Gujarat Desk: રાજકોટના પેડક રોડ પર મરજી વિરૂદ્ધ પ્રેમલગ્ન કરનારી એક યુવતીના પરિવારજનોએ યુવકના ઘર ઉપર હુમલો કર્યો હતો. હુમલાના સીસીટીવી પણ સામે આવ્યા છે. સીસીટીવી ફૂટેજના આધારે પોલીસે આરોપીઓને પકડવા માટે ચક્રો ગતિમાન કર્યાં છે.
આ ઘટના પેડક વિસ્તારના નારાયણ નગર રોડમાં રહેતા રાહુલભાઈની સાથે બની છે. રાહુલને કોલેજમાં પોતાની સાથે ભણતી નેહા સાથે પ્રેમ સંબંધ બંધાયો હતો. પરિવારજનોની અવગણના કરી નેહાએ રાહુલની સાથે વેવિશાળ કરી લીધા હતા, જેથી પરિવારજનો ગુસ્સે ભરાયા હતા. તેઓ રાહુલને અવાર નવાર ધાક ધમકી આપતા હતા. જેની ભૂતકાળમાં રાહુલે બી ડિવીઝન પોલીસ મથક ખાતે ફરિયાદ પણ નોંધાવી હતી.
રવિવારની આ ઘટના છે. જ્યારે રાહુલ તેની પત્ની નેહા અને માતા ગીતાબહેનની સાથે ઘરમાં હતો. આ સમયે નેહાના કૌટુંબિક કાકાઓ મહિપતભાઈ, રામદેવભાઈ સહિત એક અજાણ્યો શખ્સ તલવાર લઈ ધસી આવ્યો હતો. ઘરમાં ઘુસેલા આ ત્રણે લોકોએ હોબાળો મચાવ્યો હતો. ઘરના દરવાજા અને બારીમાં તલવાર ફટકારી હતી. નેહાએ દરવાજો ખોલતા ગુસ્સામાં ઓતપ્રોત નેહાના કાકાએ નેહાને સાથે લઈ જવાની માગણી કરી હતી અને ગાળો ભાંડી હતી. એટલું જ નહીં રાહુલની માતા અને નેહાની સાસુ ગીતાબહેન મામલો થાળે પાડવા વચ્ચે પડતા, જેમને થપ્પડ મારી હોવાની વિગતો પણ સામે આવી રહી છે.
થોડીવાર માટે આ સમગ્ર ઉહાપોહ બરકરાર રહ્યો હતો. નેહાએ તેમની સાથે જવાની ના પાડતા આ ત્રણે શખ્સો ત્યાંથી ચાલ્યા ગયા હતા. ધોળાદિવસે મચાવેલી ધબધબાટીના સીસીટીવી સામે આવ્યા હતા, જેમાં તલવાર લઈ રમઝમાટી બોલાવતા શખ્સો જોવા મળ્યા હતા. વાતાવરણ ડહોળાયું હતું અને આસપડોશના લોકો પણ ડઘાઈ ગયા હતા. પોલીસે હાલ સીસીટીવી ફૂટેજના આધારે આરોપીઓને શોધવા માટે તજવીજ હાથ ધરી છે.
તાજેતાજો ઘાણવો
- સુરેન્દ્રનગર જિલ્લામાં ‘ઓરેન્જ એલર્ટ’: ૪૫.૫ ડિગ્રી સાથે રાજ્યનું સૌથી ગરમ શહેર, આગામી બે દિવસ સાવચેત રહેવા અનુરોધ
- ગુજરાતમાં આજના ટોપ 5 ટ્રેન્ડિંગ ન્યૂઝ: સ્થાપના દિવસથી લઈને બુલડોઝર એક્શન સુધી ચર્ચાનો માહોલ
- રાજકોટ જિલ્લા પ્રાથમિક શિક્ષક ઉત્કર્ષ મંડળ અને બોધીસત્વ આંબેડકર બૌદ્ધવિહારના સંયુક્ત ઉપક્રમે મહારક્તદાન કેમ્પ યોજાયો
- સુરેન્દ્રનગર જિલ્લામાં કમોસમી વરસાદની આગાહી: ખેડૂતોને સાવચેતી રાખવા અનુરોધ
- શું છે ખડગેનું “અભણ ગુજરાત” નિવેદન જેણે સર્જ્યું છે રાજકીય તોફાન? જાણો સંપૂર્ણ વિગત
