Team Chabuk-Gujarat Desk: લાલ ટામેટા, લાલ ગાજર, પીળું આદુ – આ બધું તો શાકમાર્કેટમાં જોવું અતિ સામાન્ય વાત છે. પરંતુ, શું તમે કાળા ટામેટા, કાળા-પીળા ગાજર, કાળુ આદું જોયું છે ?. તમને એમ થશે, આવું તો કંઈ હોતું હશે ! પરંતુ, આ શત પ્રતિશત સાચી વાત છે. હવે તમને થશે, કે આ ક્યાં જોવા મળશે ? તો આ માટે તમારે જવું પડશે વડોદરાના કોયલીના કૌશિલ પટેલના ખેતરમાં.
વડોદરાની ભાગોળે કોયલી તરફ જઈએ એટલે રસ્તામાં આવતા કૌશિલ પટેલના ખેતરમાં પગ મૂકતા જ આપણને એક-એક શાકભાજી જાણે પોતાની તરફ આકર્ષતી હોય તેવો આંતરિક આનંદની અનુભૂતિ થાય. પ્રાકૃતિક ખેતીની ખરી વ્યાખ્યા તો જાણે અહીં ચરિતાર્થ થતી જોવા મળે છે. શાકભાજીમાં એટલી વિવિધતા, કે આપણને વિસ્મય પમાડે !
અહીં એક જ ખેતરમાં અનેકવિધ શાકભાજીને એકસાથે નહીં, પરંતુ વારાફરતી ઉગાડવામાં આવે છે. ખાસ વિશેષતા એ છે કે, આ શાકભાજીમાં લાલ તાંદલજો, ૬-૭ પ્રકારના લાલ, પીળાં અને કાળા ટામેટાં, લાલ નસોની પાલક, પંચ વર્ષીય લાલ તુવેર કે જે પાંચ વર્ષ સુધી સળંગ ચાલે છે, ૪-૫ કિલોની દૂધી કે જે ગોળાકાર અને લાંબી એમ ૨ પ્રકારની હોય છે. લાંબી દૂધીની લંબાઈ ૫-૬ ફૂટની હોય છે.
કાળા-પીળા ગાજર, અશેઢિયોની ભાજી, નેપાળી કોબીજ, ચોઈસમ ભાજી, કાળું આદું, દેશી બી વડે થતાં ઉભાં અને નાનકડાં મરચાં, પોઇ ભાજી, ૪-૫ પ્રકારની તુલસી, ઉનાળામાં થતી વાલોળ, જીવંતી ડોડી, રાયો સાગ કે જેનો કાશ્મીરી અને નેપાળી લોકો વધુ ઉપયોગ કરતા હોય છે. ખાવાની કવાચ, વિંડેજ બિન્જ, ઓસ્ટ્રેલિયન પિંક જામફળ, લૂણી ભાજી, ખાટી ભાજી, શતાવરી, ડમરો જેવા વિવિધ પ્રકારની શાકભાજી ઉપરાંત બીટ, એલોવેરા, રૂંવાટી વાળું ફ્લાવર, સરગવો, મેથી, ટિંડોરી, મીઠી લીમડી, ધાણા, પાલક, વટાણા, સુવા તરબૂચ, કારેલા, રીંગણ, લીલી ચા, પરવળ, ફુદીનો, ગલકા, પપૈયું જેવી રોજિંદી રીતે વપરાતી શાકભાજી પણ અહીં જોવા મળે છે. આ શાકભાજીમાં આપણને જરૂરી વિટામિન અને ફાઈબર પૂરતા પ્રમાણમાં મળી રહે છે.
ખેતરના માલિક અને પ્રગતિશીલ ખેડૂત એવા ૩૭ વર્ષીય કૌશિલભાઈ પટેલ કહે છે કે, “જમીન હોવા છતાં, મને ખેતી કરતા આવડતી ન્હોતી. ખેતી કરવાનો રસ હોવા છતાં, મારામાં આવડત ન હોવાના કારણે હું પૂરતો સમય આપી ન્હોતો શકતો. તેમ છતાં હું રાજ્યના કોઈપણ ખૂણે ખેડૂત સેમિનાર હોય તો પહોંચી જતો. આ રીતે ખેતીને લગતી વધુમાં વધુ માહિતી મેળવીને હું છેલ્લા દોઢ વર્ષથી ખેતી કરી રહ્યો છું. અને તેના સારા પરિણામો આજે બધાની સામે છે. કૌશિલ પટેલ ફૂડ એન્ડ ડ્રગ્સ લેબોરેટરીમાં જુનિયર સાયન્ટીફીક આસિસ્ટન્ટ તરીકે ફરજ બજાવે છે. સારો પગાર હોવા છતાં, પણ ખેતી પ્રત્યેનો તેમનો લગાવ ખરેખર કાબિલને દાદ છે.
પોતાની એક એકર જમીનમાં શાકભાજીની ખેતીથી કૌશિલ પટેલ દર મહિને સરળતાથી રૂપિયા એક લાખ જેટલી આવક રળે છે. તેમણે વધુમાં જણાવ્યું કે, અહીં અમુક શાકભાજીનો ભાવ વધારે હોવા છતાં ઘણાંય લોકો ફોન પર ઓર્ડર આપે છે. આ તમામ શાકભાજી પ્રાકૃતિક ખેતીથી થતા હોવાથી અહીં લોકોની માંગ વધુ રહે છે.
પોતાની ખેતી કરવાની શૈલી વર્ણવતા તેમણે જણાવ્યું કે, ચોમાસા પહેલાં ૬-૭ ટ્રેક્ટર જેટલું છાણીયું ખાતર આખાય ખેતરમાં એકીસાથે નાખીને તેની ઉપર સાદી ખેડ કરીને પછી જ બિયારણ નાખવામાં આવે છે. ત્યારબાદ આખુય વર્ષ કંઈપણ નાખવાની જરૂર પડતી નથી. ફક્ત સમયસર પાણી જ આપવાનું રહે છે. કહેવાય છે ને કે, જંગલમાં ઉગતી વનસ્પતિને કોઈપણ પ્રકારની સંભાળની જરૂર પડતી નથી તેમ છતાં તે ફળે-ફૂલે છે. મેં તો ફક્ત મારી રીતે શાકભાજી ઉગાડવાનો પ્રયત્ન જ કર્યો હતો, જેમાં ૧૦૦ ટકા સફળ રહ્યો છું. આજુબાજુના ખેડૂતો પણ હવે તેમની જેમ પ્રાકૃતિક ખેતી અપનાવતા હોવાનો તેમણે હરખ વ્યક્ત કર્યો હતો,
અહીં પરાગનયનની કોઈ સમસ્યા જ નથી. મધુમાખીઓ અને અલગ અલગ પક્ષીઓએ અહીં પોતાનાં ઘર કર્યા છે. ખેતરના ફરતે બુલેટ ઘાસ વડે બોર્ડર કરવામાં આવી છે. જેથી ભેજ જળવાઈ રહે અને પાકને નુકસાન ન થાય.
આ વર્ષે નવલખી મેદાન ખાતે થયેલા રાજ્ય સ્તરના ફ્લાવર શો માં કૌશિલ પટેલની ૬ ફૂટની દૂધી અને કાળી ગાજરને પ્રથમ ઇનામ તેમજ જીવંતી ડોડીને ત્રીજું ઇનામ મળ્યું હતું, જે વડોદરા માટે પણ ગૌરવની વાત છે. કૌશિલ પટેલ પ્રાકૃતિક ખેતી કરી પ્રાકૃતિક કૃષિના મંત્રને સાચા અર્થમાં ચરિતાર્થ કરવા સાથે અન્ય ખેડૂતોને પણ પ્રેરણા પૂરી પાડી રહ્યા છે.
તાજેતાજો ઘાણવો
- સુરેન્દ્રનગર જિલ્લામાં ‘ઓરેન્જ એલર્ટ’: ૪૫.૫ ડિગ્રી સાથે રાજ્યનું સૌથી ગરમ શહેર, આગામી બે દિવસ સાવચેત રહેવા અનુરોધ
- ગુજરાતમાં આજના ટોપ 5 ટ્રેન્ડિંગ ન્યૂઝ: સ્થાપના દિવસથી લઈને બુલડોઝર એક્શન સુધી ચર્ચાનો માહોલ
- રાજકોટ જિલ્લા પ્રાથમિક શિક્ષક ઉત્કર્ષ મંડળ અને બોધીસત્વ આંબેડકર બૌદ્ધવિહારના સંયુક્ત ઉપક્રમે મહારક્તદાન કેમ્પ યોજાયો
- સુરેન્દ્રનગર જિલ્લામાં કમોસમી વરસાદની આગાહી: ખેડૂતોને સાવચેતી રાખવા અનુરોધ
- શું છે ખડગેનું “અભણ ગુજરાત” નિવેદન જેણે સર્જ્યું છે રાજકીય તોફાન? જાણો સંપૂર્ણ વિગત
