Team Chabuk-National Desk: દહેરાદૂનમાં ગુરુવારના રોજ એક વિદ્યાર્થિનીની તેના સહપાઠી વિદ્યાર્થીએ છાતીમાં ગોળી ધરબી હત્યા કરી નાખી હતી. દહેરાદૂનમાંથી આરોપી વિદ્યાર્થી ભાગવાની પૂરી તૈયારી કરી ચૂક્યો હતો, પરંતુ પોલીસની નાકાબંધીમાં તે ઝડપાઈ ગયો. રાયપુર પોલીસ સ્ટેશન વિસ્તારની દાદા નગર સ્થિત એક ખાનગી કોલેજની હોસ્ટેલમાં રહેતી વિદ્યાર્થિનીને તેના જ પરિચિત આદિત્ય તોમર નામના યુવકે ગોળી મારી મોતને ઘાટ ઉતારી દીધી હતી. આ ઘટના સહસ્ત્રધારા રોડ સ્થિત સિદ્ધાર્થ કોલેજ ડાંડા ખુદાનેવાલામાં ઘટી છે. મૃતક છાત્રા ફાર્મસીના પ્રથમ વર્ષમાં અભ્યાસ કરતી હતી. ગોળી લાગ્યા બાદ વિદ્યાર્થિનીને ગંભીર સ્થિતિમાં હોસ્પિટલ સારવાર અર્થે ખસેડવામાં આવી હતી. જ્યાં તેને મૃત ઘોષિત કરવામાં આવી હતી.
મૃતક છાત્રા વંશિકા બંસલ કૃષ્ણા નગર જ્વાલાપુર હરિદ્વારની રહેવાસી હતી. જે દહેરાદૂનમાં કોલેજના હોસ્ટેલમાં રહેતી હતી. ગુરુવારની સાંજે એ પોતાની બહેનપણી મમતાની સાથે હોસ્ટેલની બહાર એક દુકાનમાંથી સામાન ખરીદી રહી હતી. એ સમયે દહેરાદૂનના સુન્દરવાલા રાયપુરનો રહેવાસી અને તેનો સહપાઠી આદિત્ય તોમર પોતાની બાઈક લઈ પહોંચ્યો હતો. એ વિદ્યાર્થિની વંશિકાને જબરદસ્તી ખેંચીને બાઈક પર બેસાડવા પ્રયત્ન કરવા લાગ્યો. વંશિકાએ વિરોધ વ્યક્ત કર્યો તો બંદૂક કાઢી તેણે વંશિકાની છાતીમાં ધરબી દીધી હતી. એ પછી આરોપી બાઈક અને બંદૂક ત્યાં છોડી ફરાર થઈ ગયો હતો.
વંશિકાની ઘટના સ્થળ પર જ મોત થઈ ગઈ હતી. ધોળા દિવસે થયેલી હત્યા બાદ વિસ્તારમાં સનસની ફેલાઈ ગઈ હતી. ઘટનાસ્થળ પર પહોંચેલી પોલીસે સ્થાનિકોની પૂછપરછ કરી હતી અને પછી ફરાર આરોપીને પકડવા માટે ચક્રો ગતિમાન કર્યાં હતા. પોલીસ સામે આરોપીએ પોતાનો ગુનો કબૂલ કર્યો હતો પણ હત્યા પાછળનું જે કારણ જાણવા મળ્યું તેનાથી પોલીસ હેરાન રહી ગઈ હતી. મૃતક વંશિકાએ એક મહિના પહેલા સોશિયલ મીડિયા પર એક ફોટો અપલોડ કર્યો હતો. જેમાં આરોપી આદિત્યએ કોમેન્ટ કરી હતી. કોમેન્ટને લઈ બંને વચ્ચે લાંબી ચર્ચા ચાલી હતી અને વિવાદનો જન્મ થયો હતો. જે વંશિકાની મોતનું કારણ બન્યો.
એટલું જ નહીં છોકરીએ આદિત્યની ફરિયાદ તેના ક્લાસના મિત્રોને કરી હતી અને મિત્રોએ આરોપી આદિત્યના પરિવારના લોકોને તેની જાણકારી આપી હતી. આગામી દિવસે આ વાતને લઈ બંને વચ્ચે ફરી ચકમક ઝરી હતી. જ્યાં છોકરીના મિત્રોએ તેને ડરાવ્યો અને ધમકાવ્યો હતો અને છોકરીના પગ સ્પર્શ કરાવડાવી માફી મંગાવી હતી. અંતે આવેશમાં આવી જઈ આદિત્યએ યુવતીને ભરબજારમાં છાતીમાં ગોળી ધરબી દીધી.
તાજેતાજો ઘાણવો
- સુરેન્દ્રનગર જિલ્લામાં ‘ઓરેન્જ એલર્ટ’: ૪૫.૫ ડિગ્રી સાથે રાજ્યનું સૌથી ગરમ શહેર, આગામી બે દિવસ સાવચેત રહેવા અનુરોધ
- ગુજરાતમાં આજના ટોપ 5 ટ્રેન્ડિંગ ન્યૂઝ: સ્થાપના દિવસથી લઈને બુલડોઝર એક્શન સુધી ચર્ચાનો માહોલ
- રાજકોટ જિલ્લા પ્રાથમિક શિક્ષક ઉત્કર્ષ મંડળ અને બોધીસત્વ આંબેડકર બૌદ્ધવિહારના સંયુક્ત ઉપક્રમે મહારક્તદાન કેમ્પ યોજાયો
- સુરેન્દ્રનગર જિલ્લામાં કમોસમી વરસાદની આગાહી: ખેડૂતોને સાવચેતી રાખવા અનુરોધ
- શું છે ખડગેનું “અભણ ગુજરાત” નિવેદન જેણે સર્જ્યું છે રાજકીય તોફાન? જાણો સંપૂર્ણ વિગત
