તમામ મહાનગરપાલિકાનું પરિણામ સ્પષ્ટ, ભાજપ અડીખમ, કોંગ્રેસનો અસ્ત, ‘આપ’નો ઉદય

Team Chabuk-Political Desk: બેરોજગારી, મોંઘવારી, પેટ્રોલ-ડીઝલ અને ગેસના વધતા ભાવ જેવા અનેક મુદ્દાને નજર અંદાજ કરીને શહેરી વિસ્તારમાં મતદારોએ ખોબલે ખોબલે ભાજપને મત આપી ફરીથી મહાનગરપાલિકામાં સત્તાનું સુકાન સોંપ્યું છે. ભાજપ પોતાના ચૂંટણી કેમ્પેઈનના સૂત્રની જેમ તમામ મહાનગરપાલિકામાં અડિખમ રહી છે. એક પણ મહાનગરપાલિકા ભાજપે ગુમાવવી પડી નથી. પરિણામ જોતા કહી શકાય કે ગત ચૂંટણી કરતાં વધુ મજબૂતાઈથી ભાજપ સત્તા પર આવી છે. જ્યારે કોંગ્રેસના હાલ ગત ચૂંટણી કરતાં ભુંડા થયા છે. જે બેઠકો હતી તે પણ કોંગ્રેસના હાથમાંથી સરકી ગઈ છે. માત્ર કહેવા પૂરતી બેઠકો પર જ કોંગ્રેસ જીતી શકી છે. તો સુરતમાં આમ આદમી પાર્ટીએ મજબૂત વિપક્ષ બનીને ભાજપ અને કોંગ્રેસ બન્નેને પરસેવો વાળી દીધો છે.

અમદાવાદ

રાજ્યની સૌથી મોટી મહાનગરપાલિકામાં ભાજપને જંગી બહુમતી મળી છે. કુલ 192 બેઠકોમાંથી ભાજપે 165 બેઠક જીતી લીધી છે જ્યારે કોંગ્રેસના ફાળે 16, AIMIM 7 અને અન્યના ફાળે 2 બેઠક ગઈ છે. કોંગ્રેસના પૂર્વ વિપક્ષના નેતા દિનેશ શર્માની પણ હાર થઈ છે. અમદાવાદ મહાનગરપાલિકામાં હાર બાદ અમદાવાદ શહેર કોંગ્રેસ પ્રમુખ શશિકાંત પટેલે પ્રમુખ પદેથી રાજીનામું આપી દીધું છે.

સુરત

સુરત મહાનગરપાલિકામાં ભાજપની જીત કરતાં આમ આદમી પાર્ટીના ઉદયની વધુ ચર્ચા થઈ રહી છે. સુરત વર્ષોથી ભાજપનો ગઢ ગણાય છે. સાથે જ હાલના ભાજપના પ્રદેશ પ્રમુખ સી.આર.પાટીલનો પણ સુરત ગઢ માનવામાં આવે છે. આ બધા પરિબળોની વચ્ચે ભાજપની સામે મજબૂત વિપક્ષ બનીને આમ આદમી પાર્ટી ઉભરી આવી છે. સુરત મહાનગરપાલિકાની કૂલ 120 બેઠકમાંથી 93 બેઠક પર ભાજપ જીતી છે જ્યારે 27 બેઠક આમ આદમી પાર્ટી આંચકી ગઈ છે. પ્રથમ વખત ચૂંટણી લડીને આમ આદમી પાર્ટીએ સુરતમાં ભાજપને જે ટક્કર આપી છે તેની ચર્ચા રાજકીય ગલીઓમાં થઈ રહી છે. જ્યારે સુરતમાં કોંગ્રેસના ડાંડિયા ડુલ થઈ ગયા છે. કોંગ્રેસ ખાતું પણ ખોલાવી શકી નથી. ગત મનપાની ચૂંટણીમાં કોંગ્રેસને 36 બેઠક મળી હતી.

વડોદરા

વડોદરા મહાનગરપાલિકામાં પણ ભાજપે બાજી મારી લીધી છે. કુલ 76 બેઠકોમાંથી 69 બેઠક ભાજપે કબજે કરી લીધી છે જ્યારે કોંગ્રેસના ભાગમાં માત્ર 7 બેઠકો જ આવી છે. વડોદરામાં મેજર અપસેટ એ સર્જાયો છે કે ભાજપના ઉમેદવાર અને પૂર્વ સ્ટેન્ડિંગ કમિટિના ચેરમેન સતિષ પટેલની હાર થઈ છે.

રાજકોટ

આમ તો ભાજપ માટે તમામ મહાનગરપાલિકામાં સારા પરિણામો આવ્યા છે પરંતુ મુખ્યમંત્રી વિજય રૂપાણીના હોમટાઉનમાં તો ભાજપનો જય જયકાર થઈ ગયો છે. ગત ચૂંટણીમાં માત્ર ચાર બેઠકથી હારી જનારી કોંગ્રેસને આ ચૂંટણીમાં માત્ર ચાર બેઠક જ મળી છે. વોર્ડ નંબર 15માં કોંગ્રેસના વશરામ સાગઠિયા સહિતની પેનલ વિજેતા બની છે બાકીના તમામ વોર્ડમાં ભાજપના ઉમેદવારોએ બાજી મારી લીધી છે. કોંગ્રેસ શહેર પ્રમુખ અશોક ડાંગર, મહિલા મોરચાના પ્રમુખ ગાયત્રીબા વાઘેલા જેવા દિગ્ગજ નેતાઓ હારી ગયા છે. હારની જવાબદારી સ્વીકારીને અશોક ડાંગરે પ્રમુખ પદેથી રાજીનામું પણ ધરી દીધું છે.

જામનગર

જામનગર મહાનગરપાલિકાની ચૂંટણીમાં અચાનક બસપાના દર્શન થયા છે. છેલ્લા ત્રણ ટર્મથી ભાજપનો ગઢ ગણાતા વોર્ડ નંબર-6માં માયાવતીની પાર્ટી બહુજન સમાજવાદી પાર્ટીએ ત્રણ બેઠકો આંચકી લીધી છે. વોર્ડ નંબર-6માં ત્રણ બેઠક બસપાને ફાળે ગઈ છે જ્યારે એક બેઠક ભાજપે જીતી લીધી છે. જામનગર મહાનગરપાલિકાની કૂલ 64 બેઠકમાંથી ભાજપે 50, કોંગ્રેસે 11 અને બસપાએ 3 બેઠક જીતી છે.

ભાવનગર

ભાવનગર મહાનગરપાલિકાની ચૂંટણીમાં પણ ભાજપે અદભુત દેખાવ કર્યો છે. અહીં કૂલ 52 બેઠકમાંથી ભાજપે 44 બેઠક પર જીત મેળવી છે જ્યારે કોંગ્રેસને 8 બેઠક મળી છે.

આમ તમામ છ મહાનગરપાલિકાઓની ચૂંટણીમાં ભાજપે વિજય પતાકા લહેરાવી છે. તો કોંગ્રેસને આત્મમંથન કરવા વધુ પાંચ વર્ષનો સમય મળ્યો છે. જ્યારે સુરતમાં 27 બેઠકો મેળવીને આમ આદમી પાર્ટીમાં વધુ જુસ્સો જોવા મળી રહ્યો છે. હવે તાલુકા પંચાયત, જિલ્લા પંચાયત અને નગરપાલિકાની ચૂંટણી પર સૌનું ધ્યાન કેન્દ્રિત છે.

તાજેતાજો ઘાણવો

• સુરેન્દ્રનગર જિલ્લામાં ‘ઓરેન્જ એલર્ટ’: ૪૫.૫ ડિગ્રી સાથે રાજ્યનું સૌથી ગરમ શહેર, આગામી બે દિવસ સાવચેત રહેવા અનુરોધ
• ગુજરાતમાં આજના ટોપ 5 ટ્રેન્ડિંગ ન્યૂઝ: સ્થાપના દિવસથી લઈને બુલડોઝર એક્શન સુધી ચર્ચાનો માહોલ
• રાજકોટ જિલ્લા પ્રાથમિક શિક્ષક ઉત્કર્ષ મંડળ અને બોધીસત્વ આંબેડકર બૌદ્ધવિહારના સંયુક્ત ઉપક્રમે મહારક્તદાન કેમ્પ યોજાયો
• સુરેન્દ્રનગર જિલ્લામાં કમોસમી વરસાદની આગાહી: ખેડૂતોને સાવચેતી રાખવા અનુરોધ
• શું છે ખડગેનું “અભણ ગુજરાત” નિવેદન જેણે સર્જ્યું છે રાજકીય તોફાન? જાણો સંપૂર્ણ વિગત