Team Chabuk-National Desk: અત્યાર સુધી માણસ પોતાની સાથે થયેલા દુરવ્યવહારનો બદલો લેતો હોય તેવું સામે આવ્યું છે. પોલીસ ચોપડે નોંધાયું છે. ન્યાયલયમાં કેસ ચાલ્યા છે. જોકે અત્યાર સુધી જાનવરોમાં પણ આવો ભાવ જાગૃત થાય છે તેવું કોઈએ નથી જોયું કે સાંભળ્યું. હવે કર્ણાટકમાં બદલો લેનારા વાંદરાની વાતોએ સમગ્ર ભારતને કૌતુકમાં નાખી દીધું છે. સોશિયલ મીડિયા પર આ મર્કટની ચર્ચાઓનો મહેરામણ ઉમટ્યો છે.
આ ઘટના કર્ણાટકના ચિકમગલૂર જિલ્લાના કોટ્ટિઘેરા ગામની છે. આ ગામમાં કેટલાક દિવસથી પાંચ વર્ષીય વાંદરાએ આતંક ફેલાવીને રાખ્યો હતો. જેનાથી લોકો ભયભીત થઈ ગયા હતા. વાંદરાને પકડાવા માટે ગામમાં રહેતા એક જગદીશ નામેરી વ્યક્તિએ વનવિભાગને આ અંગે સૂચિત કર્યા. વાંદરાને પકડાવામાં પણ જગદીશે મદદ કરી. વાંદરાને પકડી લેવામાં તો આવ્યો પણ વાંદરો જગદીશને બરાબર ઓળખી ગયો. જંગલમાં છોડ્યા પછી તે એક જ અઠવાડિયામાં પાછો ગામમાં આવ્યો. પણ લોકોને તંગ કરવા માટે નહીં દુશ્મન જગદીશ, જેણે તેને વનવિભાગના હાથમાં સોંપી દેવામાં સહાયતા કરી હતી તેની સામે બદલો લેવા માટે.
જાણકારી પ્રમાણે, 5 વર્ષીય આ વાંદરો બોનેટ મેકક્વે પ્રજાતિનો છે. એ ગામમાં આવતા જતાં લોકો પર હુમલો કરતો હતો. કોઈ ખાતું દેખાય તો ખાવાનું આચકી લેતો હતો. શાકભાજી અને ફળ વેચનારી રેકડીઓ તેના નિશાને રહેતી હતી. ગામના બાળકોને પરેશાન કરતો હતો. ગામમાં વાંદરાનો આતંક ફેલાયેલો હોવાથી ગામમાં જ રહેતા એક ઓટો ડ્રાઈવરે વન વિભાગને સૂચિત કરી દીધા. ટીમ વાંદરાને પકડીને લઈ ગઈ.
એક અઠવાડિયું તો ગામમાં નિરવ શાંતિ રહી, કોઈના જાનમાલને નુકસાન ન પહોંચ્યું. ત્યાં વાંદરો પ્રતિશોધ લેવા પરત આવ્યો. તેનો ટાર્ગેટ માત્ર અને માત્ર ઓટો ચાલક હતો. જગદીશ જ્યાં જ્યાં જતો વાંદરો તેની પાછળ પાછળ આવી જતો. વાંદરાએ તેના પર હુમલો પણ કર્યો છે. તેના ઓટોની સીટ ફાડી નાખી છે. વાંદરાના ભયથી ત્રસ્ત આ વ્યક્તિ ઘરમાં જ ક્વોરન્ટાઈન થઈ ગયો હતો. આખરે ફરી વન વિભાગને જાણકારી આપતા 22 સપ્ટેમ્બરના રોજ તેને પકડવામાં આવ્યો અને જંગલમાં છોડી દેવામાં આવ્યો.
આ ઘટના સામે આવ્યા બાદ પ્રાણીઓના નિષ્ણાતો પણ હેરાન રહી ગયા છે. આજ પહેલા આ પ્રકારની ઘટના સામે નથી આવી. વાંદરો કે કોઈ પણ જાનવર બદલો લેવા માટે 22 કિલોમીટર દૂરથી પરત નથી આવતું. ઉપરથી માણસની જિંદગી દુષ્કર કરી નાખે. હાલ નિષ્ણાતો વાનરની આ હરકત પર અભ્યાસ કરી રહ્યા છે.
તાજેતાજો ઘાણવો
- યુઝવેન્દ્ર ચહલ અને ધનશ્રીના છૂટાછેડાઃ ફેમિલી કોર્ટે આપ્યો ચુકાદો, બન્ને મોં પર માસ્ક પહેરી પહોંચ્યા કોર્ટ
- આગામી 100 કલાકમાં રાજ્યભરના ગુંડા તત્વોની યાદી તૈયાર કરવા વિકાસ સહાયનો આદેશ
- ભારતે ન્યૂઝીલેન્ડને હરાવી ત્રીજી વખત જીતી ચેમ્પિયન્સ ટ્રોફી, દુબઈમાં લહેરાવ્યો ત્રિરંગો
- અંબાલાલ પટેલની મોટી આગાહી, “એક તરફ હિમવર્ષા તો બીજી તરફ વધશે ગરમી”
- હોળાષ્ટકમાં ન કરતા આ કામ નહીં તો ભોગવવા પડી શકે છે ગંભીર પરિણામ
