Team Chabuk-National Desk: ગઈકાલે એટલે કે 1લી જુલાઈના રોજ આપણે ડોક્ટર્સ ડે ઉજવ્યો. કોરોના કાળમાં જે રીતે ડોક્ટરોએ જીવની ચિંતા કર્યા વગર દર્દીઓની સેવા કરી છે તે જોતાં લોકોની નજરમાં ડોક્ટરો પ્રત્યે માન વધી ગયું છે. પરંતુ હજુ પણ ઘણા એવા ડોક્ટરો અને હોસ્પિટલો છે જે આ માન-પાનને લાયક નથી. રૂપિયા માટે ડોક્ટરો અને હોસ્પિટલો ગમે તે હદ સુધી જવા માટે તૈયાર હોય છે તેનો એક તાજો દાખલો ઉત્તર પ્રદેશમાંથી સામે આવ્યો છે.
ઘટના ઉત્તર પ્રદેશના જનપદ હાપુડની છે. જ્યાં હજુ પણ કોરોનાના કહેર ઓસર્યો નથી. તાજેતરમાં હાપુડ શહેરના કોટવાલી વિસ્તારમાં 15 હજાર રૂપિયા ન ભરી શકવાના કારણે કોરોના પોઝિટિવ વ્યક્તિના મૃતદેહનો આશરે અઢી મહિના બાદ અંતિમ સંસ્કાર કરવામાં આવ્યા. મૃતક યુવકને એપ્રિલ મહિનામાં કોરોના થયો હતો. જેની સારવાર માટે યુવકને મેરઠ ખસેડવામાં આવ્યો હતો. મેરઠમાં સારવાર દરમિયાન યુવકનું મોત થયું હતું.
યુવકના મૃત્યુ બાદ હોસ્પિટલના ડોક્ટરોએ મૃતકની પત્નીને કહ્યું હતું કે, જો મૃતદેહ જોઈતો હોય તો 15 હજાર રૂપિયા જમા કરાવવા પડશે. 15 હજાર રૂપિયા આપશે પછી જ મૃતદેહ અંતિમ સંસ્કાર માટે મળશે, નહીંતર અમે જ અંતિમ સંસ્કાર કરી નાખીશું. હોસ્પિટલના ડોક્ટર તરફથી આ પ્રકારનો જવાબ મળતાં મૃતકની પત્ની પતિનો મૃતદેહ મેળવવા માટે 15 હજાર રૂપિયા એકઠાં કરવા માટે નીકળી પડી હતી. પત્નીએ ઘણી મહેનત કરી પરંતુ તેનાથી 15 હજાર રૂપિયાની વ્યવસ્થા ન થઈ શકી.
રૂપિયાની વ્યવસ્થા ન થવાથી પત્નીએ અંતે હાર માની લીધી અને વિચાર્યું કે હવે તો હોસ્પિટલ દ્વારા તેના પતિના અંતિમ સંસ્કાર કરી દેવામાં આવ્યા હશે. આવું વિચારીને પત્ની ત્યારબાદ મૃતદેહ લેવા ન ગઈ અને બન્ને બાળકોને લઈને પોતાના ગામ ચાલી ગઈ.
આ ઘટનાના અઢી મહિના બાદ હોસ્પિટલ તંત્રને આ મૃતદેહ અંગે જાણ થઈ. હોસ્પિટલે આ મૃતદેહને પરિવારજનો લેવા આવશે તેવી રાહ જોઈને મૂકી રાખ્યો હતો. પરંતુ અઢી મહિના બાદ પણ મૃતદેહને કોઈ લેવા ન આવતાં મેરઠ હોસ્પિટલ દ્વારા મૃતદેહને હાપુડ સ્વાસ્થ્ય વિભાગને સોંપી દેવામાં આવ્યો. હાપુડ સ્વાસ્થ્ય વિભાગે ત્રણ દિવસ પહેલા મૃતદેહને જીએસ મેડિકલ કોલેજમાં રખાવી દીધો. ત્યારબાદ તંત્રના સહકારથી મૃતકના પરિવારજનોની શોધખોળ હાથ ધરી. ગુરુવારે પરિવારજનો અંગે જાણકારી મળતાં મૃતદેહને પરિવારને સોંપી દેવામાં આવ્યો. અંતે એનજીઓના માધ્યમથી મૃતકના અંતિમ સંસ્કાર કરવામાં આવ્યા.
આમ મૃત્યુ થયાના આશરે અઢી મહિના બાદ મૃતદેહના અંતિમ સંસ્કાર કરવામાં આવ્યા. સમગ્ર ઘટનામાં હાપુડ સીએચસીના પ્રભારી ડોક્ટર દિનેશ ખત્રીનું કહેવું છે કે મૃતકના ભાઈને મેરઠ હોસ્પિટલ દ્વારા પોઝિટિવ રિપોર્ટની જાણ કરવામાં આવી હતી. પરંતુ મૃતકનો ભાઈ પોઝિટિવ રિપોર્ટની વાત સાંભળીને જ ભાગી ગયો હતો. ત્યારબાદ તેને ફોન પણ બંધ આવતો હતો. પરંતુ હવે મૃતકના મકાન માલિક અને તેની પત્નીને શોધીને મૃતદેહ સોંપી દેવામાં આવ્યો છે. મૃતદેહના અંતિમ સંસ્કાર પણ એક એનજીઓની મદદથી કરી દેવામાં આવ્યા છે.
મૃતકની પત્ની અને બાળકો જ્યારે અંતિમ સંસ્કાર માટે સ્મશાન આવ્યા તો તેમના આંખમાંથી આંસુ વહી રહ્યા હતા. મહત્વનું છે કે હોસ્પિટલ કોરોનાથી મૃત્યુ પામેલાના મૃતદેહ વધુ દિવસ સુધી રાખતી નથી પરંતુ આ કિસ્સામાં વધુ એક વખત હોસ્પિટલ તંત્રની કામગીરી પર સવાલ ઉભા થયા છે.
તાજેતાજો ઘાણવો
- સુરેન્દ્રનગર જિલ્લામાં ‘ઓરેન્જ એલર્ટ’: ૪૫.૫ ડિગ્રી સાથે રાજ્યનું સૌથી ગરમ શહેર, આગામી બે દિવસ સાવચેત રહેવા અનુરોધ
- ગુજરાતમાં આજના ટોપ 5 ટ્રેન્ડિંગ ન્યૂઝ: સ્થાપના દિવસથી લઈને બુલડોઝર એક્શન સુધી ચર્ચાનો માહોલ
- રાજકોટ જિલ્લા પ્રાથમિક શિક્ષક ઉત્કર્ષ મંડળ અને બોધીસત્વ આંબેડકર બૌદ્ધવિહારના સંયુક્ત ઉપક્રમે મહારક્તદાન કેમ્પ યોજાયો
- સુરેન્દ્રનગર જિલ્લામાં કમોસમી વરસાદની આગાહી: ખેડૂતોને સાવચેતી રાખવા અનુરોધ
- શું છે ખડગેનું “અભણ ગુજરાત” નિવેદન જેણે સર્જ્યું છે રાજકીય તોફાન? જાણો સંપૂર્ણ વિગત
